Sekretarja për punët e Brendshme e Britanisë së Madhe, Theresa May ka ndërhyrë për herë të parë në debatin e gjerë që po zhvillohet në vend ku përplasen mendimet pro dhe kundër daljes nga Bashkimi Europian.
Ajo deklaroi se Britania duhet të largohet e të mos jetë më pjesë e konventës europiane për të drejtat e njeriut e cila, sipas saj, “mundet që t’i lidhë duart parlamentit”.
Në fjalimin që duket të jetë ndërhyrja e saj e parë e rëndësishme në fushatën e referendumit pro dhe kundër qëndrimit në BE, Theresa May tha se traktakti në fjalë nuk shton asgjë në prosperitetin e vendit, madje e bën atë më pak të sigurtë për shkak se ndalon “deportimin e shtetasve të huaj të rrezikshëm”.
May, në fakt, mbështet fushatën për qëndrimin e Britanisë së Madhe në Bashkimin Europian, por ajo tha: “Nëse ne dëshirojmë të reformojnë ligjet e të drejtave të njeriut në këtë vend, nuk është BE nga i cili duhet të largohemi, por konventa europiane të drejtave të njeriut dhe juridiksioni i gjykatës së saj”.
Ajo tha se fjalimi që mbajti nuk është një sulm apo një kritikë ndaj njerëzve që kanë pikëpamje të ndryshme. Sekretarja e Brendshme theksoi se pyetja së cilës duhet t’i përgjigjet vendi në referendumin e 23 qershorit është sesi “duhet të maksimizohet siguria e Britanisë, prosperiteti dhe ndikimi i saj në botë – dhe sovraniteti ynë”.
Ministrja pohoi se ka problemeve të shkaktuara nga të qënit anëtar i Bashkimit Europian, mirëpo këmbënguli se kjo anëtarësi sjell, gjithashtu, edhe avantazhe.
Për sigurinë – një nga pikat kyçe të debatit – ajo tha se Britania do të ketë ende një marrëdhënie me Shtetet e Bashkuara dhe do të jetë akoma pjesë e pesë shërbimeve inteligjente që ndajnë të dhëna mes tyre, edhe në rast të fitores së Brexit, duke iu referuar traktatit të mbikqyrjes që autorizon ndarjen e të dhënave të shërbimeve sekrete mes Mbretërisë së Bashkuar, Australisë, Kanadasë dhe Zelandës së Re.
“Ne do të ndajmë sërish të dhëna rreth terrorizmit e krimit me aleatët tanë europianë dhe të njëjtën gjë do të bëjnë ata me ne”, tha ajo. “Kjo nuk do të thotë se ne do të jemi po aq të sigurtë sa edhe në rastin kur qëndrojmë në BE”.
May hodhi poshtë si të pavërtetë argumentin se BE nuk e bën Britaninë më të sigurtë, për shkak se anëtarësia do të thotë se vendi nuk ka kontroll mbi kufijtë e vet. Ajo theksoi se rregullat e lëvizjes së lirë duan të thonë se është më e vështirë të mbahet nën kontroll volume i emigracionit europian, por “…ato nuk duan të thonë se ne nuk kontrollojmë dot kufijtë”.
Referuar nevojës për një bashkëpunim më të mirë pas sulmeve në Paris dhe Bruksel, sekretarja e brendshme britanike theksoi se sipas gjykimit të saj, të jesh anëtar i BE-së do të thotë të jesh më i sigurtë nga krimi dhe terrorizmi.
Përgatiti: Juli Prifti – /tesheshi.com/
