Rama nuk i është përgjigjur akuzave të rivalit të tij demokrat Basha, por dikasteri i Shëndetësisë po. Nga Ministria e drejtuar prej znj. Manastirlliu, thuhet se “duke filluar nga Janari 2018, fishat për fëmijët diabetikë, për herë të parë rimbursohen falas. Me një VKM të posaçme, në datën 29.12.2017 , Qeveria shqiptare miratoi, për herë të parë, këtë vendim të rëndësishëm. Rreth 1500 fëmijë të moshës 0-18 vjeç, brenda muajit Janar, do të marrin falas Fishat e Diabetit. Me këtë vendim, qeveria shqiptare merr përsipër rimbursimin e 2 milion e 190 mijë fishave në vit. Jo vetëm kaq, por do të garantohen edhe aparatet e glicemisë falas, si dhe gjilpërat falas, për fëmijët diabetikë. Fondi i vënë në dispozicion, nga qeveria shqiptare, për rimbursimin e fishave të diabetit, është 43.8 milion lekë”.
Basha pretendoi të kundërtën dhe tha se Rama po gënjen, por Ministria thotë se genjëstra është në anën e PD-së
“Kemi ende shumë për të bërë për shëndetësinë që duam, por ndryshe nga Partia Demokratike, e cila nuk di tjetër veçse të gënjejë, ne e kemi nisur vitin me tre vendime të rëndësishme, të cilët kanë një impakt të drejtpërdrejtë për qytetarët: Rimbursimin e fishave të diabetit për fëmijët 0-18 vjeç, si dhe ofrimin falas të paketës së radioterapisë dhe paketës së kataraktës për ndërhyrjet në sy, si në spitalet publike ashtu edhe në ato jopublike, për të ofruar më shumë shërbime falas për qytetarët, në rrugën drejt shëndetësisë që duam”, thuhet në reagimin e MM.
Megjithatë, është e pamunduar të kundërshtohet ajo që thotë kreu demokrat, se spitalet shqiptare po vuajnë një eksod masiv të mjekëve dhe infermierëve. Këtë pikë, deklarata e Ministrisë së Shëndetësië nuk e merr në trajtim. /tesheshi.com/
