Ministria e Bujqësisë paralajmëron qytetarët që nesër të kenë kujdes dhe të bëhen gati për shi të madh dhe të marrin masa paraprake kundër përmbytjes. Me një fjalë që shiu të mos i zërë në gjumë.
Në bazë të parashikimeve nga shërbimet meteorologjike në vend, ditën e hënë dhe të martë parashikohen reshje të dendura shiu në zonat veriore dhe verilindore, kështu që mund të mbushet përplot kaskada e Drinit, pra mund të krijojnë probleme ne zonat e ulëta si Lezha e Shkodra.
Ministria e Bujqësisë i ka kërkuar Bordeve te Kullimit dhe strukturave te tjera që të jenë në gatishmëri, të mbajnë në gjendje pune dhe nën monitorim të vazhdueshëm hidrovoret, argjinaturat dhe të kenë në gjendje punë të gjithë ekskavatorët.
Vetëm gjatë muajve të fundit me dhjetëra banesa dhe qindra hektarë tokë në qarkun Lezhë janë përmbytur disa herë si pasojë e reshjeve intensive. /tesheshi.com/
