Kreu i Rendit, Fatmir Xhafaj, është detyruar që të shpjegojë Opinion një takim të tij dhjetra vite më parë, kur ai ishte student, me ish-udhëheqësin komunist Enver Hoxha. Xhafaj tha se ishte 1 maji i vitit 1981 dhe se ai ishte në vitin e dytë të Juridikut.
Njoftimin që do takonte Enver Hoxhën në tribunë për t’i çuar një tufë me lule, i ishte bërë një natë më parë dhe përzgjedhja e tij ishte bërë për shkak të rezultateve të larta në studime. “Unë nuk vija nga nomeklatura”, tha Xhafaj. Lulet, sqaroi ai, do i jepeshin Enverit në emër të të rinjve kosovare që atë vit nuk munden të vinin në Tiranë.
Nga ana tjetër, gjatë një momenti që Xhafaj po sqaronte nisjen e procesve të kontrollit të pasurisë dhe mbi politikanët, ai iu drejtua Fevizut: “pse m’sheh, se ke gjithnjë një vështrim dyshues”.
Xhafaj iu referua për pyetjen e tij retorike, një grimase të zakonshme të drejtuesit të Opinion-it, që në rastet kur interviston tek-për-tek ndonjë politikan a qeveritar të lartë, përgjigjet që i jepen i shoqëron me shprehi habitore me një gojë gjysmë të hapur. Dhe në rastin e Xhafajt, ishte pikërisht kjo shprehi që e bëri ministrin të reagojë me pyetjen e pazakontë. /tesheshi.com/
