Ministri i Rendit Fatmir Xhafaj ka larguar nga detyra kreun e Policisë së Shtetit, Haki Çako, ndonëse kjo është servirur për publikun si “lirim nga detyra”, pra thënë në një formë më të zbutur dhe shoqëruar nga fjalë vlerësuese në terma kortezialë.
“Me propozim të Ministrit të Brendshëm, zotit Fatmir Xhafaj, Këshilli i Ministrave miratoi lirimin nga detyra të Drejtorit të Përgjithshëm të Policisë së Shtetit, Drejtues Madhor Haki Çako.
Ministri Xhafaj, vlerëson kontributin, angazhimin dhe përkushtimin e zotit Çako në drejtimin e Policisë së Shtetit, gjatë viteve të fundit. Ai ka një karrierë të gjatë në Polici dhe ka drejtuar me profesionalizëm struktura të niveleve të ndryshme.
Ministri Xhafaj, pati një takim gjatë të cilit e falënderoi Drejtues Madhor Çakon për punën dhe bashkëpunimin e deritanishëm, në përmbushjen e misionit të Policisë së Shtetit.
Megjithatë, realizimi i objektivave të këtij mandati qeverisës, në fushën e rendit dhe sigurisë publike, sfidat që e presin Policinë e Shtetit, kërkojnë një ritëm më të shpejtë dhe dinamikë të madhe pune. Për këtë arsye është i domosdoshëm një lidership i ri, me energjitë të reja për të motivuar dhe çuar përpara punën e Policisë së Shtetit”, thuhet ndër të tjera në njoftimin e Ministrisë së Brendshme.
Shkarkimi i Çakos vjen në një kohë kur Policia e Shtetit, jo vetëm është bërë pis me imazhin e një strukture të implikuar me trafikun e drogës, por dhe të paaftë për të zbuluar raste krimesh, siç qe së fundi vrasja e dyfishtë në Lushnje apo ajo e ekzekutimit në derën e shtëpisë të vëllait të ish deputetit Arben Ndoka në Lezhë, Aleksandër Ndoka. Rasti i Elbasanit po ashtu konfirmoi krizën e uniformave blu.
Nga ana tjetër, Çako është etiketuar nga disa segmente të politikës, më saktë LSI, dhe posaçërisht ish-kreu i saj Meta, sot President, si “Haki droga”. Ne tre vjet të drejtimit prej tij të Policisë së Shtetit, Shqipëria njohu një kanabizim të frikshëm në territor. /tesheshi.com/
