Ministri i Rendit, Fatmir Xhafaj, ka ndërmarrë një akt paksa diversionist nga pikëpamja politike. Ai i ka përcjellë një letër kreut të Krimeve të Rënda, Besim Hadarmataj, duke i kërkuar që të thërrasë për dëshmi në lidhje me 618 kg kokainë të kapur, dy figurat qëndrore të PD-së, Lulzim Bashën dhe Sali Berishën. Sipas tij, kjo dyshe është deklaruar se ka dijeni mbi gjithçka në lidhje me sasinë, kush qëndron pas saj, e për këtë arsye duhet të dëshmojnë.
“Nga këto deklarime publike bie veçanërisht në sy fakti se nga zoti Sali Berisha dhe zoti Lulzim Basha pretendohet qartë që ata kanë dijeni për fakte konkrete lidhur me klanet e trafikut të drogës në Shqipëri. Po sipas këtyre deklarimeve publike, rezulton se të dy këta persona kanë veçanërisht dijeni mbi poseduesit dhe përfituesit e sasisë prej 613 kilogram kokainë të sekuestruar së fundmi në Portin e Durrësit”, shprehet ministri Xhafaj.
Më tej, kreu i Rendit shprehet:
“Çmoj se ka interes të ligjshëm publik dhe posaçërisht për hetimin që është duke u kryer që, nga ana e institucionit që ju drejtoni, të thirren këta persona dhe të deklarojnë përpara Prokurorisë së Krimeve të Rënda, në zbatim të dispozitave të Kodit të Procedurës Penale, faktet për të cilat kanë dijeni dhe provat, që ata zotërojnë për klanet kriminale të trafikut të drogës, përfshi edhe rastin e fundit të sekuestrimit të 613 kilogram kokainë’’.
“Ndërkohë unë njoh dhe respektoj faktin se zyra që ju drejtoni është organi kompetent që Kushtetuta dhe ligji e ngarkojnë të marrë dhe të vlerësojë ligjërisht deklarimet e këtyre zotërinjve dhe vërtetësinë e tyre, ndaj është përgjegjësia juaj institucionale dhe detyrimi kushtetues e ligjor i zotit Sali Berisha dhe i zotit Lulzim Basha që t’i paraqesin organit që ju drejtoni, faktet dhe provat mbi trafikun e drogës në Shqipëri, që ata pretendojnë në deklarimet e tyre publike”, thekson ministri Xhafaj. /tesheshi.com/
