Pasardhësi i Saimir Tahirit në krye të Rendit, Fatmir Xhafaj, ka dalë në mbrojtje të policisë, siç tha, në luftën e saj të përditshme me trafikantët. Por duke qëndruar brenda kontekstit të një zhvillimi të pazakontë, atë për implikimin e paraardhësittë tij në trafik droge, pas përgjimit të bisedave të Moisi Habilajt, Xhafaj tha se mediat duhet të merren dhe me ata gjyqtarë e prokurorë që lirojnë trafikantët.
“Të gjithë flasin për trafikun dhe trafikantët, por harrojnë të ngrenë zërin për gjyqtarët e korruptuar; flasin për trafikun dhe trafikantët, por pak për policët e ndershëm që punojnë me përkushtim për t’u përballur me trafikantët. Ndaj, shpreh mirënjohje për veprimtarët e shoqërisë civile që i janë përkushtuar kësaj kauze. Lufta kundër trafikut është kombëtare dhe nuk ka parti”, tha Xhafaj duke folur në një konferencë për trafikun e qenieve njerëzore, ku e ashpër në fjalët e saj ishte ambasadorja e Bashkimit Europian, Romana Vlahutin.
“Ka kriminelë që në këtë vend fitojnë të ardhura nga gratë dhe fëmijët. Numri i të dënuarve për këtë krim është ende shumë i ulët”, tha znj. Vlahutin. /tesheshi.com/
