Aleksandër Vulin, ministër në qeverinë e Serbisë, po luan hajgare me qeverinë dhe policinë e Kosovës, duke e shpërfillur në tërësi shtetin dhe institucionet e Kosovës.
Burime të portalit tesheshi.com, informojnë se Vulin ka injoruar tërësisht pikat e kalimit kufitar me Kosovën dhe është futur kaçakshme në territorin kosovar, gjatë shkuarjes për në Pejë për të kremtuar Pashkët Ortodokse, atje ku së fundi ka deklaruar se duhet të zbardhen krimet ndaj…jo të serbëve ndaj shqiptarëve, por e kundërta.
Sipas burimit, Vulinin më kot e ka pritur Policia e Kosovës me orë të tërë në pikat kufitare Merdare, Jarinje dhe Dheu i Bardhë për ta shoqëruar eskortën e tij për në Patriarkanën e Pejës, pasi që ai kishte hyrë ilegalisht.
Kjo për shkak se Vulini kishte theksuar në letër-kërkesën për hyrje në Kosovë se do të futej në Merdare, pastaj në Jarinje, dhe në fund kishte thënë se do të hynte në pikën kufitare tek Dheu i Bardhë.
“Për këtë lëmsh të shkaktuar nga ai, Policia e Kosovës njësia për shoqërim të eskortave të zyrtarëve të lartë ishte detyruar që për mbi 3 orë ta presin ministrin serb në këto tri pika kufitare, por ai nuk erdhi”, ka thënë burimi.
Dhe, pas mbi 3 orë pritjeje, autoritetet janë njoftuar se Vulini kishte arritur në Patriarkanën e Pejës.
Por nga kishte hyrë?
Sipas burimit kofidencial, ministri Vulin ka hyrë në Kosovë në vendin e quajtur Tresavë, rrugë kjo që shfrytëzohet për kontrabandë të drogës, armëve si dhe të mallrave nga Serbia në Kosovë.
Lidhur me këtë fakt, zyrtarë të policisë së Kosovës të kontaktuar nga portali tesheshi.com, nuk kanë dashur që të flasin. /tesheshi.com/
