Një zyrtar i lartë i partisë në pushtet në Beograd, dhe ministër i qeverisë, deklaroi në veriun e Mitrovicës se duan ta bashkojnë qytetin për t’ia kthyer Serbisë.
Ndërkohë, që prej një viti, kur u hoqën rojet e urës mbi Ibër, u tha nga ndërkombëtarët se qyteti do të bashkohet, e tashmë edhe veriu do të jetë pjesë e Republikës së Kosovës. Madje për këtë është firmosur në Bruksel nga vetë Vuçiçi, kryeministri serb që sot po i hedh benzinë zjarrit nëpërmjet vartësit të vet.
Në fillim të fushatës elektorale për zgjedhjet parlamentare të 24 prillit, Marko Gjuriq, drejtori i zyrës për Kosovën në Serbi, që është në rang dikasteri, ishte në Mitrovicë për të kërkuar vota për llogari të Partisë Progresiste Serbe, e cila drejtohet nga kryeministri Aleksandër Vuçiç.
Siç bën të ditur agjencia serbe e lajmeve serbe Tanjug, Gjuriq mbajti një takim elektoral në Mitrovicën e Veriut, ku theksoi se, “SNS-ja ka objektiv ta bashkojë qytetin dhe t’ia bashkangjisë Serbisë.”
“Unë shpresoj se SNS-ja do të fitojë të njëjtin numër votash në Mitrovicën e Veriut dhe në Mitrovicën e Jugut, e kudo në Serbi. Populli serb është i bashkuar dhe kërkon që të fuqizohen institucionet dhe pozicioni ndërkombëtar i vendit tonë,” tha Gjuriq.
Prej një viti, pas negociatave edhe të dy kryebashkiakëve të qytetit të ndarë me dhunë në vitin 1999, u ra dakord që të hiqen muret ndarëse dhe të ashtuquajturat barrikada “të paqes”.
Por absurdi është se ndërsa për serbët që jetojnë në zonën e jugut jo vetëm ka jetë normale, madje edhe mund të votojnë për Serbinë, shqiptarët nuk mund t’i gëzojnë shtëpitë dhe pronat që i kanë në fshatrat e veriut, por edhe në qytet. Ata jetojnë si endacakë kudo nëpër Kosovë, dhe s’mund të kthehen apo t’i rindërtojnë banesat që po u shemben.
Mitrovica e Veriut do të jetë edhe qendra e Asocacionit të Komunave Serbe, apo e ashtuquajtura “Zajednica”. /tesheshi.com/
