Ministri i Jashtëm ukrainas Dmytro Kuleba paralajmëroi të hënën për “pasoja shkatërruese” në rast të mungesës së konsensusit midis bllokut 27-anëtarësh për hapjen e negociatave të pranimit të vendit të tij me Bashkimin Evropian.
“Nuk mund ta imagjinoj, as nuk dua të flas për pasojat shkatërruese që do të rezultojnë nëse Këshilli Evropian i 27-ve nuk e merr atë vendim”, tha Kuleba, duke e quajtur atë “nëna e të gjitha vendimeve”.
Ai beson se mosmarrja e një vendimi për hapjen e negociatave të anëtarësimit do të ishte e dëmshme jo vetëm për Ukrainën, por edhe për procesin e zgjerimit të BE-së. “Ne bëmë pjesën tonë. Ne presim që BE të bëjë pjesën e saj,” tha kreu i diplomacisë ukrainase dhe i tha Evropës se “nuk mund të shkojë kundër rrjedhës së historisë”.
“Ukraina do të bëhet anëtare e BE. Pyetja e vetme është nëse dikush do ta ngadalësojë atë proces, i cili do të kishte një çmim, apo nëse ne do të përparojmë pa ndalur,” shtoi Kuleba.
Kryeministri hungarez Viktor Orbán mbetet i vendosur në kundërshtimin e tij ndaj hapjes së negociatave të pranimit me Kievin dhe rritjes së ndihmës për Ukrainën. Në nëntor, Komisioni Evropian mbrojti hapjen e negociatave të pranimit në BE me Ukrainën dhe Moldavinë, dy vende që morën statusin e kandidatit në qershor 2022.
Komisioni propozoi gjithashtu ndarjen e 50 miliardë dollarëve në ndihmë për Ukrainën deri në vitin 2027. /tesheshi.com/
