Omer Çelik, ministri turk për Çështjet e Bashkimit Europian, ka dalë në një konferencë shtypi pas një takimi me ambasadorët e BE-së në Ankara, ku nuk e ka fshehur pakënaqësinë për qëndrimin e vendeve europiane në lidhje me organizatat terroriste.
Veç qasjes ndaj arrestimit të deputetëve të HDP-së, indinjatën turke e ka provokuar vendimi i një gjykate në Belgjikë që nuk e njeh PKK-në si organizatë terroriste.
“BE-ja duhet të jetë në gjendje të vendosë rregull në standardet e dyfishta të përdorura nga institucione të ndryshme të saj ndaj PKK-së. Vendimi i një gjykate belge që nuk e njeh PKK-në si një organizatë terroriste është një sulm i drejtpërdrejtë mbi Konventën Europiane të të Drejtave të Njeriut. Ky vendim është një shkelje e të gjitha konventave ndërkombëtare. Kjo nuk është e pranueshme,” ka thënë zyrtari i lartë turk në konferencën e shtypit.
Ai ka sjellë në vëmendje ndalimin e një partie baske në Spanjë në vitin 2003 pasi u provua se ajo financonte ETA-n.
“Nuk ka asgjë të gabuar me arrestimin e deputetëve të HDP-së. Në Spanjë apo Venezuelë, qeveritë kanë bërë të njëjtën gjë kundër grupeve terroriste. Në këto rrethana, nëse një palë nuk e trajton PKK-në si një organizatë terroriste, ajo po praktikon standarde të dyfishta ndaj terrorizmit, dhe nuk ka dallim midis tolerimit të terroristëve të PKK-së dhe të DAESH-it.”
Ai ka shkuar më tej, duke nënvizuar negativitetin e qëndrimeve europiane ndaj Turqisë.
“Shprehja kundër Turqisë është bërë politikë kryesore e vendeve europiane. Vendet europiane duhet ta mbështesin Turqinë ndaj përpjekjes së dështuar për grusht shteti të FETÖ-s dhe PKK-së në vend të kritikimit të vazhdueshëm të zyrtarëve të Ankarasë. Ato përdorin një fjali në favor të Turqisë, e nëntë të tjera kundër zyrtarëve turq.” /tesheshi.com/
