Ministri turk i Mbrojtjes, Hulusi Akar, i përçoi një tjetër mesazh Greqisë për t’u ulur e zgjidhur mes tyre mosmarrëveshjet mbi Egjeun.
Në një intervistë për Haber Global, ai akuzoi Athinën se shtrembëron të vërtetën dhe nuk dëshiron një zgjidhje paqësore të problemeve.
“Ne nuk do të lejojmë të shkelen të drejtat tona, as nuk do të lejojmë një fakt të kryer. Ne e përsërisim këtë. Kështu tha presidenti ynë. Nuk po tallemi. Mos provoni asnjë aventurë si budallenj të llastuar, duke u mbështetur te të tjerët. Ejani si njerëz, të ulemi të flasim”, theksoi ai.
Siç theksoi ai, për momentin ka tension të madh mes Greqisë dhe Turqisë, për shkak të “militarizimit” të ishujve të Egjeut.
Duke theksuar faktin se kryeministri grek bëri thirrje për pezullimin e shitjes së F-16 në Turqi në fjalimin e tij në Kongres në maj, Akar e quajti atë fjalim… të pasjellshëm: “Ajo që bëri Mitsotakis ishte një turp i madh. Ai e mbajti këtë fjalim në Kongresin Amerikan…”, tha ministri turk i Mbrojtjes.
Sipas tij, megjithatë, duket se ka mesazhe pozitive për shitjen e F-16 nga SHBA. “Ne besojmë se Kongresi Amerikan, si shtet sovran i pavarur, do të marrë vendimin e duhur duke marrë parasysh marrëdhëniet me Turqinë dhe interesat amerikane. Zhvillimet pozitive në lidhje me F-16 dhe modernizimin do të vazhdojnë në sektorin ushtarak amerikan”, tha ai.
Ministri turk më pas iu referua pajisjeve militarizuese të ishujve të Egjeut:
“Ne kemi bërë planet tona në Egje, Mesdheun Lindor dhe Qipro. Greqia nuk do të arrijë asgjë duke militarizuar ishujt. Pavarësisht shkeljeve dhe ngacmimeve, ne themi të flasim, ta zgjidhim problemin në mënyrë paqësore. Ne flasim për paqen, por askush nuk duhet ta perceptojë këtë si dobësi.
Ata nuk do të shkelin të drejtat tona. Ata nuk mund të arrijnë askund as me pajisje, as me aleanca. Ne kemi absolutisht të drejtë. Ne jemi të vendosur të mbrojmë të drejtat tona, jemi të vendosur dhe jemi të aftë për këtë. Le të ulemi dhe të flasim si burra. Le të përfitojnë njësoj vendet tona nga pasuritë e Egjeut”, tha Akar, duke përcjellë dhe njëherë propozimin e Ankarasë për të bërë një pakt mes fqinjësh, duke e ndarë pasurinë e përbashkët të Egjeut. /tesheshi.com/
