Një ditë pas kërkesës për pezullimin nga detyra të kreut të përgjithshëm të Policisë së Shtetit, Haki Çako, ministri i rendit, Saimir Tahiri, ka sulmuar ashpër gjygjtarin që dha vendimin për pezullim. “Ai ka liruar nga burgu njerëz që kanë kryer vepra të rënda penale”, tha Tahiri, gjatë një prezence në Panairin e Policisë.
“Ka liruar nga burgu njerëz që kanë kryer vepra të rënda penale. U shkarkua, por papritur kthehet prapë në detyrë. Si mund të kthehet në detyrë një gjyqtar që liron një vrasës nga burgu? Ky gjyqtar pati guximin moral për të shkelur ligjin e për të dhënë një vendim tërësisht politik. Ky gjyqtar është fytyra e vërtetë e atyre që mbrohen nga ata që nuk e duan reformën në drejtësi. Është përfaqësues i korporatës së të korruptuarve. Ka ardhur dita që jemi në një test historik për t’u ndarë nga e shkuara. Jemi përpara një provimi madhor për të ardhmen e fëmijëve tanë. Duhet të ndajmë nëse në drejtësi na duhen prokurorë e gjyqtarë që vendosin për qytetarin apo për të fortin. Nuk duam të korruptuar në gjykata që janë peng i atyre që i kanë emëruar”, u shpreh Tahiri, duke theksuar dhe faktin se gjygjtari në fjalë është një i ish-i shkarkuar për korrupsion dhe për mospërmbushje të detyrës.
Fjala është për gjygjtarin Arian Aliaj, i cili dhe më parë ka patur në dorë vendime për çështje me sfond politik. /tesheshi.com/
