Ministri i Brendshëm, Saimir Tahiri ka avancuar sot dhe me presidentin Nishani, në një reagim të ashpër ndaj gjygjtarit Arian Aliaj, atij që mori vendimin për të pezulluar nga detyra kryepolicin e shtetit, Haki Çako. Si formë të tij akuzuese ndaj kreut të shtetit në pozitën e kryetarit të Këshillit të Lartë të Drejtësisë, Tahiri zgjodhi pyetjet retorike:
“Gjykata thotë se Arian Aliaj u zgjodh pasi gjyqtari i radhës kishte probleme shëndetësore. Ky është justifikim si ai i Lulit kur justifikonte mungesën në gjykatë me raporte mjekësore. Gjykata ka dhënë një vendim haptazi të parregullt dhe joligjor. Pyes presidentin, pse u përzgjodh Arian Aliaj, i cili është shkarkuar nga detyra pasi ka lejuar lirimin nga burgu të një personi të dënuar me 14 vjet për dhunë seksuale me të mitur?! Për cilën arsye u përzgjodh Aliaj, që ka dhënë dhe 4 vendime të tjera për të dënuar që kanë kryer vepra të rënda penale si vjedhje me armë e me dhunë?! Përse u përzgjodh ky gjyqtar?!”, është shprehur Tahiri.
Dhe sipas Tahirit, është e kuptueshme që nuk mund të ketë përgjigje nga kreu i shtetit, derisai ai, siç tha kreu i Rendit ka qëndruar në heshtje edhe kur është pyetur për gjyqtarë të tjerë të përfshirë sipas tij në raste të ngjashme.
Për ministrin Tahiri, segmente të prokurorisë dhe gjykatës janë bërë pjesë e frontit që nuk duan reformën në drejtësi. /tesheshi.com/
