Ministri i Brendshëm kosovar, Skënder Hyseni ka braktisur një konferencë në Bratislavë në shenjë proteste ndaj de nominimit që i është vendosur Kosovës (Kosovo/UNSCR 1244/1999).
“Ky de nominim është i papranueshëm ka theksuar ministri Hyseni, duke shtuar se nëse i bëhet çfarëdo reference Rezolutës 1244 , duhet t’i bëhet referencë e qartë edhe mendimit të Gjykatës Ndërkombëtare të Drejtësisë për Pavarësinë e Kosovës, në pajtim me marrëveshjen e arritur në Bruksel, pra në pajtim me fusnotën e cila është aplikuar edhe në MSA të nënshkruar midis Kosovës dhe BE-së.
Hyseni po ashtu theksoi se vetëm muaj më parë, ai kishte nënshkruar me FRONTEX-in marrëveshje bashkëpunimi me atë denominim që ishte dakorduar edhe Brukseli, ku i bëhet referencë e qartë edhe mendimit të GJND-se.
Kreu i Rendit në Kosovë ka theksuar në fund se do të kthehet në këtë nismë në emër të shtetit ksoovar, sapo të bëhen korrigjimet e nevojshme në pajtim me marrëveshjen e Brukselit për përfaqësimin e Kosovës.
Ministri Hyseni ishte ftuar nga Robert Kalinak, zëvendëskryeministër dhe ministër i Punëve të Brendshme të Sllovakisë, aktualisht kryesues i Këshillit të Bashkimit Evropian, kishte udhëtuar për në Bratislavë, për të marrë pjesë në Konferencën e tretë Ministrore të Procesit të Pragës. /tesheshi.com/
