Ministri i Bujqësisë në Kosovë, serbi Nenad Rikalo është zotuar se gjatë mandatit të tij do t’i japë një impuls të ri zhvillimit të bujqësisë, për të arritur rezultate më të mira në njërin nga sektorët më të rëndësishëm për zhvillimin ekonomik.
Ai këto komente i bëri sot gjatë një takimi me sekretarin e Përgjithshëm të ministrisë, Kapllan Halimi, kryeshefin e Agjencisë për Zhvillimin e Bujqësisë, Elhami Hajdari, atë të Agjencisë Pyjore të Kosovës, Ahmet Zejnullahu, si dhe me drejtorët e departamenteve të ministrisë.
Gjatë këtij takimi, ministri Rikalo prezantoi para bashkëpunëtorëve të tij të shërbimit civil iniciativën e tij, gjithmonë duke pasur në fokus zhvillimin e bujqësisë dhe fermerin si përfitues kryesor.
Me këtë rast, Rikalo theksoi se do të japë mbështetjen e tij për të realizuar programet mbështetëse për fermerët, si atë të pagesave direkte ashtu edhe atë të granteve investive, në përputhje me dokumentet strategjike.
Kujtojmë se jo pak shqetësime ka ngritur në opinion sidomos tek fermerët dhe partitë opozitare ndarja e këtij dikasteri qeveritar për komunitetin serb./tesheshi.com/
