Sergej Sojgu, ministri rus i Mbrojtjes, ka zhvilluar një vizitë të paparalajmëruar në Siri, gjatë së cilës është takuar dhe me shefin e regjimit sirian, Beshar Esadin.
Një njoftim i zëdhënësit të Ministrisë ruse të Mbrojtjes, Igor Konashenkov, ka bërë të ditur se vizita e ministrit është bërë me kërkesë të presidentit Putin.
Çështjet ushtarake, bashkëpunimi në fushën e mbrojtjes midis dy vendeve, si dhe lufta ndaj grupeve terroriste në Siri, mësohet të kenë qenë tema e bisedimeve.
“Në takim u diskutuan çështje të aktualitetit, në lidhje me bashkëpunimin ushtarak midis ministrive të mbrojtjes të dy vendeve, si dhe aspekte të caktuara të bashkëpunimit në luftën kundër grupeve terroriste që janë aktive në territorin sirian,” shpjegoi Konashenkov.
Ministri rus i Mbrojtjes kreu dhe një vizitë inspektuese në bazën ajrore ruse të Hjejmimit në provincën e Latakias, si dhe pa nga afër sistemin raketor S-400 të dislokuar atje.
Rusia do të bëhej pjesë aktive e konfliktit pesëvjeçar sirian në fundin e shtatorit të 2015-ës, kur edhe nisi një fushatë sulmesh ajrore ndaj forcave që luftojnë kundër regjimit të Esadit. Mbështetja ruse e ka ndihmuar ushtrinë e Esadit të përparojë e të rimarrë një pjesë të mirë të territorit të Sirisë. /tesheshi.com/
