Xhudoja kosovare, me simbolin e saj, kampionen olimpike Majlinda Kelmendi, ka qenë dhe mbetet një ndër “amasadoret e Kosovës” në botë, falë emrit të madh në arenën e sportit. Por ja që atë që ka dhënë e po jep për vendin e saj, jo domosdoshmërisht po e merr nga instancat qeveritare. Dhe dy ditë pas formimit të qeverisë së re Haradinaj, nga kampi qeveritar i Ramushit janë dhënë shenjat e para të një vëmendjeje të shtuar, ndaj xhudos në përgjithësi, pra asaj kosovare, dhe Majlindës në veccanti.
Kështu, ministri i Kulturës, Rinisë dhe Sportit Kujtim Gashi, ka pritur në një takim drejtuesit e Federatës së Xhudos së Kosovës, Agron Kuka, Memli Krasniqi, trajnerin, Driton Kuka dhe kampionen olimpike Majlinda Kelmendi.
Kryetari i FXHK-së, Agron Kuka e informoi ministrin për punën që po bën Federata e Xhudos, arritjet dhe përgatitjet që janë duke bërë për garat në të ardhmen, me theks për pjesëmarrje në lojërat olimpike që do të mbahen në Tokio 2020.
Kuka tha se kanë 25 xhudistë elitarë të nivelit botëror, ndërsa përmendi edhe vështirësitë me të cilat përballen, ndër to është edhe çështja e realizimit të obligimeve nga ana e MKRS-së.
AI u shpreh se vlerëson punën dhe bashkëpunimin e deritashëm me MKRS-në, duke shtuar se pa mbështetjen e MKRS-së nuk do t’i arrinim rezultatet e deritashme në sportin e xhudos.
Ndërkaq, kampionia olimpike Majlinda Kelmendi, tha se shpresonte që mbështetja e MKRS-së për të dhe për FXHK-në nuk do të mungojë.
Ministri Gashi theksoi se është dita e parë e punës dhe se është i privilegjuar që ndër takimet e para po e zhvillon me krenarinë e Kosovës, Majlinda Kelmendi dhe drejtuesit e federatës së suksesshme të FXHK-së, duke u zotuar se mbështetja e MKRS-së për xhudon kosovare nuk do të ndërpritet, veçse do të rritet edhe më tej.
Ai u shpreh se është i informuar për disa obligime të mbetura nga ana e MKRS-së në drejtim të FXHK-së por edhe të Majlindës dhe se ato shumë shpejtë do të përmbushen.
Ministri shprehu gatishmërinë për të bashkëpunuar me drejtuesit e xhudos me qëllim që rruga dhe tradita e rezultateve në këtë sport të vazhdojë edhe më tej. /tesheshi.com/
