Masakër strukturore, e ka cilësuar ish-ministri i Bujqësisë, Edmond Panariti, reformën e propozuar në mbledhjen e Asamblesë së PS-së, ku disa ministri shkrihen dhe bashkohen me të tjerat.
Panariti duke u ndalur konkretisht në ristrukturimin e Ministrisë së Bujqësisë, paralajmëroi se pasojat do të bien mbi fermerin shqiptar.
“Një Ministri Bujqësie, pa gjymtyrë, pa mision dhe vizion është ajo çka mbetet pas “zhdukjes” së pakuptimtë të Drejtorive të Bujqësisë dhe Bordeve të ujitjes dhe kullimit në qarqe, pas asgjesimit me një të rënë lapsi të shërbimit qendror veterinar, shërbimit të statistikave bujqësore, mbrojtjes së bimëve, shërbimit të ndihmës dhe këshillimit të fermerëve.
Kjo “masaker” strukturore e paparë, mjerisht u gatua “ex catedra,” pa pyetur fermerët, specialistët, profesorët dhe kërkuesit universitare të fushës , pa marrë parasysh projektet e mbështetjes nga BE dhe donatorët, të cilët vepronin dhe veprojnë mbi këtë shtrat institucional.
Ajo që pritet të ndodhë është paraliza e shërbimeve ndaj fermerëve dhe Agrobiznesit, por më e rënda dhe e paevitueshme është lënia e bujqësisë dhe blegtorisë tërësisht pambrojtje ndaj sëmundjeve, infeksioneve dhe kërcënimeve të motit. Bujqësia rrezikon të rrëshqasë në kaos dhe pasiguri.
Kirurgu e “përfundoi” operacionin por pacienti mjerisht vdiq”, shkruan Panariti në rrjetet sociale. /tesheshi.com/
