Petrit Vasili, ministri i Drejtësisë është përplasur sërish me operacionin ndërkombëtar të monitorimit, apo thënë më qartë misioni i SHBA dhe BE që skanon gjyqtarët dhe prokurorët në vend.
Javën e shkuar, ministri i Ilir Metës i dërgoi një letër kreut-grua të ONM-së, duke i kërkuar se sa në mbështetje të Kushtetutës është misioni i tyre.
E sot, Genoveva Ruiz Calavera i ka kthyer përgjigje Ministrit të Drejtësisë, ku nuk pranon të futet në debatin politik.
“KE nuk mund të komentojë shqetësimet për ONM-në”, thuhet në letrën që Calavera i ka dërgon ministrit Vasili.
Ndër të tjera në letër sqarohet se “ONM ka vetëm rol monitorues në procesin e Vetingut. Sipas marrëveshjes ajo nuk ka rol vendimmarrës”.
Zyrtarja spanjolle që shkakton kokëçarje pikërisht tek ata që nuk e kanë patur fort për zemër Reformën në Drejtësi, ka mohuar mundësitë që të ketë një marrëveshje të re me Shqipërinë për ONM-në, duke theksuar në letër se Bordi i Monitorimit është organ teknik, i një natyre jopolitike.
“ONM nuk ka nevojë për një marrëveshje të re me Shqipërinë. Bordi i Monitorimit është organ teknik, i një natyre jopolitike. ONM do kryejë detyrën që Kushtetuta e Shqipërisë i ka besuar”, thuhet ndër të tjera në letër. /tesheshi.com/
