Sandër Lleshi e ka nisur ndryshe detyrën e tij si ministër, në të parin komunikim me vartësit në publik.
Starti qe me ata që nuk jetojnë më, të rënët, pasi kreu i ri i Rendit zgjodhi t’jua kujtojë të gjallëve, duke vënë një kurorë në memorialin e dëshmorëve nga radhët e Policisë së Shtetit, humbur jetën ndër vite në përballje me krimin.
“Më së pari, përballë kësaj sakrifice kërkohet që të përulet vetë Policia e Shtetit dhe çdo pjesëtar i saj. Profesioni i policit është i bazuar tek nderi, sensi i detyrës dhe integriteti. Një sens i fortë dhe i qartë për nderin personal dhe nderin profesional për punonjësin e policisë janë pjesë thelbësore e identitetit, pjesë e ADN-së së tij.
Më pas, uniformave blu, eprori i tyre i lartë u kujtoi se ç’përfaqsojnë e ç’duhet të përfaqsojnë, me detyrën që kanë zgjedhur të kryejnë.
Duke cituar gjeneralin e famshëm Douglas MacArthur, Lleshi tha: “Detyra, nderi, atdheu: këto tri fjalë të shenjta në mënyrë solemne, ju diktojnë se çfarë duhet të jeni, çfarë mund të jeni dhe çfarë do të jeni. Ato janë pika juaj e referencës për të ndërtuar kurajë, atëherë kur ajo duket se po ju braktis; për të rifituar besim, atëherë kur duket se pak gjë ka mbetur për t’u besuar; për të krijuar shpresë atëherë kur ajo ka humbur. Të pabesët do t’ju thonë se këto janë vetëm fjalë, vetëm slogane, vetëm fraza boshe. Të gjithë pedantët, demagogët, cinikët, hipokritët, ngatërrestarët… do të përpiqen t’i zhvlerësojnë ato deri në skajin e talljes.” /tesheshi.com/
