Ministri i Rendit Sandër Lleshaj, tha se policia përballet sa me sulme nga krimi, por dhe sa me sulme nga politika
“Për shkak të natyrës së ndërlikuar të misionit që kryen, jo rrallë herë, Policia e Shtetit është bërë shënjestër e sulmeve të ndryshme. Sigurisht, ajo do të jetë në shënjestër të sulmeve të krimit, për të cilat është e përgatitur dhe e gatshme të përballet dhe të fitojë.
Por ka edhe një kategori tjetër sulmesh, kryesisht politike, për të cilat Policia e Shtetit nuk është dhe as nuk ka ndërmend të përgatitet për mbrojtje.
Policia duhet të jetë e rreshtuar në front përballë me krimin, ndërsa krahët dhe shpinën e saj duhet dhe do ta mbrojë politika e përgjegjshme, qeveria, institucionet dhe mbi të gjitha qytetarët, aleatët e saj të përhershëm”, tha kreu i Rendit, duke folur në një ceremoni për 106-vjetorin e Policisë së Shtetit.
Ndërsa i pyetur në lidhje me ndërhyrjen e policisë te studentët e ngujuar, Lleshaj tha se askush nuk është penguar që të protestojë, porse një grup sipas tij po pengojnë të tjerët që të vijojnë mësimin.
“Policia punon për sigurinë e vendit. Studentët kanë protestuar me të gjitha mënyrat që donin, tani s’flasim për studentët por për një grup të vogël që po bllokojnë universitetin”, tha Lleshaj. /tesheshi.com/
