Ministri Lleshaj foli sërish për grabitjen në Rinas, duke mbrojtur dhe vendimin për dërgimin e disa njësive ushtarake për sigurinë e areportit. Nga foltorja e parlamentit, kreu i Rendit tha se ngjarje të tilla ndodhin kudo, por nuk gjejnë trajtim si në Shqipëri.
“Gjëra të tilla mund të ndodhin kudo. Ajo që ka ndodhur është e rëndë. Ne kemi marrë masa të forta të plota për të zhbërë një histori turpi që është transferuar para 20 viteve në duart e një privati. Transferuam sovranitet në duart e një koncesionari privat. Nëse shikoni do të gjeni edhe emra të njohur që kanë kontribuuar në këtë situatë. Po, është një cenim i sigurisë kombëtare dhe jo rrëzim.
Aktorë dhe përgjegjës ndër vite për këtë situatë shqetësohen pse ndërhyri ushtrinë në aeroport. FA e ka në mision kushtetues sigurinë kombëtare. Nëse konstatojmë se është cënuar apo kërcënuar, FA ka detyrë që të japë kontributin e tyre. Ajo nuk kanë hyrë si forca të armatosura, por në mbështetje të policisë. Porta e Rinasit u cenua në kuadrin e disa sekondave. Nuk është turp kombëtar por incident.
Mos harroni 11 Shtatorin se çfarë ndodhi, apo goditje terroriste, por asnjë komb nuk çohet të shpallë gjendje të pa shpresë. Nuk ka asgjë për t’u alarmuar. Policia reagoi në kohë rekord dhe në mënyrë të paparë. Ky grup kriminal është arratisur nga burgu i një vendi anëtar të BE-së, por nuk u shpall turp kombëtar atje”, tha Lleshaj.
Ndërkohë, për çështjen e e dërgimit të njësive ushtarake në Rinas ka shfaqur padakortësi dhe presidenti Meta. Kreu i shtetit i ka dërguar kërkesë për sqarim Shefit të Shtabit Bardhyl Kollçakut, por ministrja Xhaçka tha se “nuk ka debat kushtetutes, nuk po shkojmë në luftë. Nuk ka dislokim trupash ushtarake. Nuk kemi situatë të cenimit të sigurisë kombëtare ku do duhej të kishim marrë miratim të parlamentit (jo të presidentit), kemi vetëm cenim të sigurisë së një objekti të rëndësisë së parë, nuk kemi cënim të Kushtetutës”. Ajo tha se Policia Ushtarake është e detyruar të marrë këto masa, pasi sipas ligjit, duhet të garantohen të gjitha objektet që janë në funksion të NATO-s.
“Gjysma e pistës është infrastrukturë ushtarake, i takon komandës ajrore. Këtu ulen edhe avionë ushtarakë, kemi prezencë ushtarake edhe në Aviacionin Civil. Nuk po diskutojmë dislokim trupash, por marrje të masave të sigurisë të një infrastrukture ushtarake. Policia jonë ushtarake e ka për detyrë një gjë të tillë, me sinjalizim të komandave, jo me sinjalizim të ministrit, shtabit, apo aq më pak presidentit”, sqaroi Xhaçka. /tesheshi.com/
