Ministri i Rendit Sandër Lleshaj tha se banda e grabitësve të Rinasit ka patur aktivitet kriminal edhe në Kosovë. Sipas tij, pos të arrestuarve të deritanishëm, ka dhe të tjerë që pritet të bijnë nën pranga.
“Kjo çështje është ende nën hetim. Megjithëse ka ecur shumë, unë nuk mund të ekspozoj detaje të shumta. Grupi tashmë i shkatërruar tashmë ka një arkiv të pasur të aktiviteteve negative kriminale jo vetëm në Shqipëri por edhe në Kosovë. Procedurat e hetimit vazhdojnë në funksion të zbardhjes dhe kapjes së autorëve. Do të ketë arrestime të tjera. Disa nga krerët e grupit janë arrestuar por ka edhe të tjerë”, deklaroi kreu i Rendit.
Ai komentoi dhe protestat e opozitës me bllokim rrugësh, duke gjykuar se ky është një degradim politik. “Bllokimi i rrugëve është degradim politik në të gjitha aspektet. Nuk është bllokimi i rrugëve zgjidhje politike. Nuk mund ta mbysësh qeverinë duke bllokuar rrugët, qeverinë e mbyt duke fituar zgjedhjet. Duke bllokuar rrugët mbyten qytetarët”, tha Lleshaj. /tesheshi.com/
