Eshref Rifi, një kundërshtar i ashpër i lëvizjes Hezbullah në Liban, ka dhënë dje dorëheqjen, duke e arsyetuar atë me dominimin e qeverisë së vendit nga grupi shiit.
“Hezbullahu e ka përdorur këtë qeveri për të konsoliduar projektin e tij të një shteti të vogël. Ka kërkuar ta shfrytëzojë atë si një mjet për ta shtrirë kontrollin e vet mbi shtetin dhe vendimet e tij,” ka deklaruar ai.
“Unë nuk do të pranoj të bëhem dëshmitar i rremë dhe mbulesë për ata që përpiqen t’i dominojnë shtetin dhe institucionet e tij, e kjo është arsyeja pse po paraqes dorëheqjen.”
Ministri i dorëhequr i Drejtësisë e akuzoi Hezbullahun se është përgjegjës për krizën politike në Liban, e cila prej 21 muajsh e ka lënë vendin pa president.
Sipas tij, Hezbullahu, i mbështetur nga Irani, po i shkatërron marrëdhëniet e Libanit me Arabinë Saudite. Eshref Rifi iu referua kështu vendimit të dy ditëve më parë të Arabisë Saudite për t’i pezulluar tre miliardë dollarë ndihmë për ushtrinë libaneze në shenjë proteste ndaj qëndrimeve armiqësore të frymëzuara nga Hezbullahu.
Përplasja rajonale mes Arabisë Saudite dhe Iranit reflektohet fort në Liban, me Hezbullahun të mbështetur hapur nga Irani, e me bllokun e Saad Haririt më pranë Arabisë Saudite. Luftëtarët e Hezbullahut gjenden prej kohësh në Siri, duke luftuar kundër kryengritësve, në krah të regjimit të Esadit. /tesheshi.com/
