Ministri i Mbrojtjes i qeverisë teknike të Kroacisë ka lëshuar sërish një mesazh të fotë ndaj zyrtarëve serbë.
Javën e shkuar, Beogradi ka denoncuar atë që e ka quajtur “shpallje lufte nga ana e Ante Kotromanoviç”.
Ai tha se zyrtarët serbë po kërkojnë ta bëjnë problem rritjen e kapacitetit të mbrojtjes së Kroacisë, por nëse ishin paqedashës ata duhet ta tregonin këtë në vitet ‘90 kur shkatërruan e shkretuan të gjithë popujt e ish-Jugosllavisë.
Në një intervistë për reviztën Slobodna Bosna, Kotromanoviç tha se zyrtarët serbë janë kampionë të luftërave në ish-Jugosllavi.
“Vuçiç, Nikoliç dhe Daçiç ishin kampionë në drejtimin e katër luftrave në territorin e shtetit jugosllav. Ata mund të parandalonin humbjen e dhjetëra mijëra jetëve nëse do të ndiqnin një politikë paqësore”, shtoi ai duke theksuar se Beogradi duket të jetë i kënaqur se ai nuk do të jetë gjatë ministër i Mbrojtjes i Kroacisë.
Kotromanoviç deklaroi se e drejta e mbrojtjes i takon çdokujt dhe se Kroacia është një vend i NATO-s dhe Bashkimit Europian dhe nuk ka asnjë pretendim për të pushtuar dikë.
“Unë jam krenar që Serbia tani doli hapur. Unë mendoj që ata duan të hyjnë në BE duke bashkëpunuar me rusët. E çuditshme! Ne si Kroaci po punojnë që të forcojmë ushtrinë në bazë të një politike të përbashkët sigurie me BE-në”, tha Kotromanovic.
Ministri kroat i Mbrojtjes tha se nuk ka ndonjë opinion negativ nëse Serbia do të blinte sisteme raketore ruse.
“Ne nuk kemi ndonjë mendim negativ, mjafton që ata të mos sulmojnë e shajnë Kroacinë.
Serbia është një fqinj që ne e çmojmë dhe e llogarisim. Ne u urojmë fat atyre dhe duam që ekonomia e tyre të rritet, por ata të na lënë të bëjmë punën tonë dhe të kujdesemi për veten siç ne dimë më mirë”, tha ai.
Kotromanoviç shtoi më tej se nuk e kuptonte irritimin serb sidomos pas ftesës ndaj malit të Zi për tu pranuar në NATO.
“Çfarë i shqetëson ata? Do të hyjmë në luftë? Padyshim që Kroacia nuk do luftë. Ky është nonsens. Unë nuk di se ç’kanë ata në kokat e tyre, por unë do të isha i lumtur të ndihmoja ushtrinë time të rritet dhe shpresoj se kjo do të ndihmojë edhe ushtrinë serbe të shtohet”, tha Kotromanoviç. /tesheshi.com/
