Kreu i diplomacisë turke, Mevlut Cavusoglu ka realizuar të parën vizitë në një vend europian që nga ngjarjet e grushtit të shtetit, dhe këtë në një vend fqinj, Greqi, aty ku janë arratisur një grup ushtarakësh të dyshuar si të implikuar nga vendi i tij.
Ai u takua me homologun Nikos Kotzias në ishullin e Kretës, duke kërkuar esktradimin e tyre, ndërkohë që nga Kotzias mori këtë përgjigje:
“Kemi qenë të qartë që në fillim me palën turke, kur thamë se kjo çështje do të zgjidhet në gjykatat greke në bazë të ligjeve të vendit tonë dhe atyre europiane. Fillimisht duhet parë me saktësi cili ka qenë niveli i pjesëmarrjes së tyre në përpjekjen për grusht shteti”, tha Kotzias.
Fjala është për 3 majorë, 3 kapitenë dhe dy kapterë. Këta të fundit e mohojnë çdo përfshirje të tyre në ngjarjet e mbrëmjes së 15 korrikut, por nga ana tjetër druhen se kthimi në Turqi do t’u vinte jetët në rrezik. /tesheshi.com/
