Frank-Walter Steinmeier e ka vlerësuar marrëveshjen midis BE-së dhe Turqisë si rrugën e duhur për zgjidhjen e krizës së refugjatëve.
Siç raporton Deutsche Welle, kryediplomati gjerman ka deklaruar se numri i refugjatëve në Greqi do të kishte qenë shumë më i madh nëse nuk do të kishte një marrëveshje të tillë. “Kjo është arsyeja pse marrëveshja Turqi – BE dhe mbështetja për Greqinë janë rruga e drejtë për ta zgjidhur këtë problem,” ka thënë ai.
Autoritetet greke kanë lajmëruar për uljen e numrit të refugjatëve që mbërrijnë në ishujt grekë nga Turqia. Gjatë javës së shkuar pati dhe ditë ku në këto ishuj nuk mbërriti asnjë refugjat. Steinmeier e ka vënë në pah rënien e kalimeve të paligjshme, duke theksuar dhe rëndësinë e Turqisë si një vend partner.
Ministri i Jashtëm gjerman i ka kritikuar ndërkohë disa vende anëtare të BE-së për hapat e njëanshëm në kuadër të frenimit të vërshimit të refugjatëve.
“Një sërë vendesh europianolindore shkaktojnë shqetësim për vendet e tjera me përqendrimin vetëm në problemet e tyre. Qindra emigrantë janë në mes të një krize humanitare në Greqi për shkak të mungesës së bashkëpunimit.”
Mijëra refugjatë gjenden të bllokuar në Greqi pasi një pjesë e mirë e vendeve ballkanike i kanë mbyllur kufijtë për ta, e po kështu dhe një pjesë e vendeve lindore. Një numër i madh refugjatësh vijojnë të qëndrojnë në Idomeni, pranë kufirit maqedonas. /tesheshi.com/
