Në një debat televiziv mbrëmjen e shkuar në televizionin publik çek, Lubomir Zaoralek, ministri i Jashtëm i Çekisë, e ka akuzuar shefin e Komisionit Europian, Jean-Claude Juncker, se nuk është përpjekur ta ndalojë daljen e Britanisë nga BE-ja.
“Që tani nuk mund ta shoh presidentin e Komisionit Europian si njeriun e duhur për punën.”
Ai ka pretenduar se Juncker-it i ka munguar aktiviteti i duhur para referendumit të së enjtes në Britani.
“Nuk dua t’i bëj thirrje ndokujt (të dorëhiqet), por dikush në BE duhet ta mendojë mbase largimin, sepse (Brexit-i) është një përgjegjësi që duhet ta marrë dikush,” është shprehur kryediplomati çek në debatin televiziv.
Zaoralek ka thënë se shefi i Komisionit Europian duhej të kishte shkuar në Britani e t’u kishte thënë britanikëve se, “Ne duam që ju të qëndroni!”
“Ka ndodhur kjo, apo jo,” ka pyetur ai retorikisht, duke lënë të kuptohet se përgjigjja është negative.
Që prej së premtes, kur edhe u mësua rezultati i referendumit në Britani, kanë pasuar reagime të gjithfarëllojshme, e një prej tyre është dhe kërkesa e kreut të politikës së jashtme çeke për dorëheqjen e Juncker-it. /tesheshi.com/
