Punësimi i militantëve nga partitë politike në borde të ndërmarrjeve dhe në pozita të ndryshme në institucionet e shtetit është një prej brengave më të mëdha me të cilat ballfaqohet Kosova që nga paslufta.
Njerëz partiak pa kualifikime të duhura dhe merita adekuate, vendosen në pozita kyçe duke lënë në rrugë shumë kuadro të dëshmuara që nuk shkojnë pas partive të caktuara.
Se ky është një problem që do zgjidhje e tha sot edhe ministri i Punëve të Jashtme i Britanisë së Madhe, Boris Johnson, i cili kërkoi nga liderët politikë të Kosovës që vendosjen e njerëzve nëpër poste ta bëjnë sipas meritave dhe jo sipas lidhjeve të tyre.
“Njerëzit kanë të drejtë që të kërkojnë llogari nga përfaqësuesit e zgjedhur, ju duhet të flisni me ata dhe të dëgjoni shqetësimet e tyre. Vendosja e njerëzve sipas meritës, do të thotë se nëse jeni student dhe punoni shumë duhet të gjeni një vend pune dhe nuk do të shtyheni anash me bërryla nga një kandidat i dobët që ka lidhje më të mira sesa ju. Ne mbështesim krijimin e vendeve të punës dhe jam i zhgënjyer që nuk ka lëvizje për këtë gjë sepse unë doja të isha në qendrën e skijimit në Brezovicë dhe të dilja në pistë”, tha Johnson, sot në fjalimin e tij para deputetëve të Kuvendit të Kosovës.
Ish-prefekti i Londrës, bëri poashtu thirrje që Kosova ta luftoi korrupsionin dhe krimin e organizuar. /tesheshi.com/
