“Unë nuk shoh një marrëveshje të qëndrueshme sa të jem gjallë, dhe kam ndër mend të jetoj pak më gjatë.” Këto janë fjalët që tha 64-vjeçari Moshe Yaalon-i, ministri izraelit i Mbrojtjes, në një konferencë të përvitshme pranë Tel-Avivit.
Gjykimi i tij tregon se sa e zymtë është perspektiva e bisedimeve midis izraelitëve dhe palestinezëve. Yaalon-i, që drejton një prej ministrive më të rëndësishme dhe është një prej aleatëve më të ngushtë të Netanyahu-t, theksoi më tej se palestinezët ua kishin “përplasur derën” bisedimeve të mëtejshme të paqes.
Përgjigjja ndaj komenteve të ministrit izraelit erdhi nga një zyrtar i Organizatës për Çlirimin e Palestinës, i cili i bëri të ditur agjencisë Reuters se për procesin e bllokuar të paqes duheshin fajësuar izraelitët. Ai u shpreh se refuzimi i izraelitëve për të rënë në ujdi për ngulimet dhe për t’u njohur refugjatëve palestinezëve të drejtën e kthimit do të thotë se ata janë përgjegjës për perspektivën e zbehtë të bisedimeve të përtërira.
Negociatat e paqes u ndërprenë në prill të vitit të shkuar, pas debatave mbi ndërtimin e ngulimeve izraelite në territoret e pushtuara dhe pas marrëveshjes së bashkimit midis presidentit palestinez Mahmud Abbas dhe Hamasit.
Kryeministri izraelit, Benjamin Netanyahu, deklaroi më herët këtë vit, gjatë fushatës elektorale, se nuk do të kishte shtet palestinez nëse ai mbetej drejtuesi i vendit. /tesheshi.com/
