Ministri italian i Mbrojtjes Guido Crosetto tha të dielën se vendi mori atë që ai e quajti një vendim “të tmerrshëm” kur iu bashkua Iniciativës së Kinës “Një brez dhe një rrugë” katër vjet më parë.
“Vendimi për t’u bashkuar me Rrugën e re të Mëndafshit ishte një akt i improvizuar dhe i tmerrshëm që shumëfishoi eksportet kineze në Itali, por nuk pati të njëjtin efekt në eksportet italiane në Kinë”, tha Crosetto në një deklaratë për gazetën Corriere della Sera.
Ai shtoi se Italia tani është në një problem sepse duhet të largohet nga nisma kineze dhe në të njëjtën kohë të mos dëmtojë marrëdhëniet me Pekinin.
“Kina është një konkurrente, por është edhe një partner”, theksoi Crosetto.
Italia iu bashkua nismës kineze nën qeverinë e mëparshme, duke u bërë i vetmi vend i madh perëndimor që ndërmori një hap të tillë.
Kryeministrja italiane Giorgio Meloni tha javën e kaluar se qeveria e saj po shqyrtonte ende anëtarësimin në iniciativë, duke shtuar se ajo do të vizitonte Pekinin në të ardhmen e afërt.
“Ne do të marrim një vendim përpara dhjetorit”, tha Meloni për Fox News, duke theksuar se çështja kërkon bisedime me qeverinë kineze, si dhe një diskutim në parlamentin italian.
Nisma “Belt and Road” parashikon rinovimin e nismës “Rruga e Mëndafshit” për të lidhur Kinën me pjesën tjetër të Azisë, Evropës dhe vendet e kontinenteve të tjera me projekte të mëdha infrastrukturore.
Kritikët e shohin nismën si një mjet për Kinën për të zgjeruar ndikimin e saj gjeopolitik dhe ekonomik. /tesheshi.com/
