Avionët rusë që kryejnë misione bombardimi mbi Siri nisën në fillim të kësaj jave të përdorin një bazë ajrore në perëndim të Iranit për t’u ulur dhe për t’u stacionuar. Përdorimi i një baze ajrore iraniane për avionët rusë të përfshirë në konfliktin sirian ngjet për herë të parë që prej fillimit të fushatës së Rusisë në mbështetje të Sirisë.
Ministri iranian i Mbrojtjes, Husein Deghan, ka deklaruar se baza ajrore e Hamedanit u ka hapur dyert avionëve rusë me kërkesën e qeverisë siriane për të luftuar “terrorizmin”.
Sipas tij, përdorimi i bazës ajrore të Hamedanit është rezultat i bashkëpunimit të ndërsjelltë.
“Pritja e avionëve luftarakë rusë në bazën ajrore në Hamedan është kryer, brenda kornizës së bashkëpunimit të ndërsjelltë dhe të luftës kundër terrorizmit, me kërkesë të qeverisë siriane,” ka deklaruar zyrtari i lartë iranian.
Pamjet e një pesëvjeçari të nxjerrë nga rrënojat në Halep ditë më parë pas bombardimeve ajrore u shoqëruan me akuza për misionin rus në Siri. Ministria e Mbrojtjes e Rusisë do t’i hidhte poshtë pretendimet, duke deklaruar se nuk kishte kryer bombardime mbi atë zonë civile në Katerxhi të Halepit.
Dislokimi i avionëve luftarakë rusë në bazën ajrore në Iran flet për intensifikimin e luftimeve në Siri, posaçërisht në Halep. /tesheshi.com/
