Ministri i Jashtëm i Malit të Zi, Srđan Darmanoviç, ka thënë se për vendin e tij tema e Demarkacionit është e mbyllur. Ai shtoi se Podgorica beson në kapacitetin e institucioneve dhe se do të pres me durim zgjidhjen e kufirit me Kosovën.
Gjatë një debati me titullin “Ora e qytetarëve”, Darmanoviç ka thënë se sa i përket Demarkacionit, Mali i Zi nuk mund të ndikojë në asnjë vendim të qeverisë së Kosovës, përfshirë edhe vendimin për formimin e Komisionit të ri shtetëror në krye me Shpejtim Bulliqin.
“Ne kemi raporte shumë të mira me Kosovën dhe s’kemi dyshim se kështu do të vazhdojë. Për Malin e Zi, kjo çështje është mbyllur dhe nuk do t’i kthehemi më. Besojmë në kapacitetin demokratik të institucioneve të Kosovës dhe me durim po presim zgjidhjen përfundimtare të demarkacionit me Kosovën” ka thënë ai.
Ai shprehet se Mali i Zi ka disa çështje të hapura me Kroacinë, si ajo Prevllakës, por sipas tij, një marrëveshje e përkohshme është duke funksionuar shumë mirë.
“Ne duam të zgjidhim këtë me rrugë bilaterale, nëse nuk shkojmë në mekanizma ndërkombëtarë që janë të njohur. Duhet t’u besojmë mekanizmave të së drejtës ndërkombëtarë. Kjo çështje nuk do t’i cënojë raportet tona”, tha Dermanoviç duke iu referuar kontestit me Kroacinë. /tesheshi.com/
