Ministri i Inovacionit dhe Ndërmarrësisë Besim Beqaj sot ka dhënë dorëheqje në zyrën e kryeministrit, një ditë pasi kreu i partisë se tij Kadri Veseli mori vendim për largimin e personave që kanë aktakuza korruptive.
Në mesin e tre zyrtarëve të PDK-së, në emër të ë cilëve kishte akuza, ishte edhe vet Besim Beqaj. Megjithatë, ky i fundit po pretendon se është i pafajshëm.
“Besoj se drejtësia do ta vërtetojë pafajësinë time”, tha Beqaj në një konferencë për shtyp të mbajtur në ambientet e ministrisë që deri tani e drejtonte.
“Vepra për të cilën po gjykohem është shkelja e statusit të barabartë të shtetasve dhe banorëve të Republikës së Kosovës. Aktakuza ka një mal të metash dhe që në fillim është aplikuar drejtësi selektive. Mund t’ju siguroj secilit prej jush se në rast të një procesi të drejtë gjyqësor unë do të lirohem nga aktakuza”.
Beqaj megjithatë nuk pranoi të fliste keq për kreun e partisë që e liroi nga detyrat politike, duke thënë thjesht se respekton vendimet e partisë.
Ndaj Beqajt për më shumë se një vit rëndon akuza e rastit “Pronto” ku në ministrinë që ai udhëhiqte janë punësuar pa kriter militantë të PDK-së, siç thuhet në përgjimet e dala, madje edhe pa konkurruar. /tesheshi.com/
