Ministri i Tregtisë dhe Industrisë në qeverinë “Haradinaj”, Endrit Shala, një ndër ideatorët e padyshim firmosësit e taksës ndaj mallrave nga Serbia e Bosnja, ka tentuar të shuajë çdo përfolje për një tërheqje të mundshme të kësaj mase.
“Përderisa unë jam dhe do të vazhdojë të jem prapë ministër i Tregtisë dhe Industrisë, përderisa ashtu siç kam thënë edhe më herët, nuk eliminohen arsyet të cilat neve si Qeveri e Republikës së Kosovës na kanë detyruar të marrim një vendim të tillë, atëherë masa e vendosur në raport me Serbinë dhe Bosnjë e Hercegovinën duhet të vazhdojë të mbetet në fuqi dhe kjo do të duhej të vlejë për secilin ministër, për secilën qeveri të ardhshme që vjen me udhëheq me vendin”, ka deklaruar Shala në një interviste për Ekonomia Online.
Ky reagim vjen ndërsa janë shtuar zërat ndërkombëtare që flasin për një anullim të taksës pas dorëheqjes së Haradinajt.
E siç shihet, Shala jep garanci se kjo masë ekonomike me sfond politik, do vijojë dhe pas Haradinajt. /tesheshi.com/
