Nga Mensur Krasniqi
Pas përzgjedhjes së Prokurorit Special në Republikën e Maqedonisë, kishte një dilemë tjetër se cili do jetë ekipi që do të ketë në krah prokurorja e përzgjedhur, Katica Janeva në punën e saj, dhe prej sa anëtarëve do të përbëhet ky ekip.
Kjo dilemë nis të zbardhet pas takimit që ajo pati me ministrin e Drejtësisë, Adnan Jashari.
Mësohet në këtë takim, se ky i fundit ka porositur drejtorin e Shërbimit për punë të përgjithshme dhe të përbashkëta pranë qeverisë, Vase Donevski, që deri nesër mbrëma të gjejë së paku dy-tre objekte që janë në pronë të qeverisë, të cilat do t’i përgjigjen kërkesave të Prokurores Speciale, Janeva, të dhëna sipas ligjit pikërisht për postin e lartë që ajo mban.
Dhe thuhet se objektet duhet të kenë mbi 25 zyra, që lë të nënkuptojmë se edhe ekipi i Prokurores Special do jetë me mbi 25 anëtarë.
Nga ana tjetër, vijnë edhe reagimet e para të grupit të socialistëve dhe demokratëve në Parlamentin Evropian lidhur me emërimin e Katica Janeva për Prokurore Speciale.
Marrëveshja e arritur sipas tyre është një element i rëndësishëm për të zgjidhur krizën politike.
“Përgëzoj partitë në Maqedoni për arritjen e marrëveshjes. Emërimi i Prokurores Speciale paraqet një hap të rëndësishëm në vendosjen e transparencës në vendin. Deputetët do të jenë edhe më tutje të përkushtuar që të implementojnë plotësisht marrëveshjen dhe vendi të vazhdojë rrugën e saj euroatlantike, si vend demokratik, prosperues dhe shoqëri multietnike ku e drejta do të respektohet”, ka deklaruar ish raportuesi për Maqedoninë në Parlamentin Evropian, Riçard Hovit, shkruan NOVA.
Nënkryetari i socialistëve, Knut Flekenshtajn, bëri thirrje për hetim të pavarur dhe sa më të shpejtë për dyshimet që rrjedhin nga audio-incizimet.
“Po ashtu ju bëjmë thirrje partive të tregojnë përkushtim të plotë për implementimin e pikave tjera të marrëveshjes politike dhe reformat e nevojshme”, ka thënë Flekeshtajn.
Emërimi i Katica Janeva deri tani ka marrë përkrahje nga partitë në vend të angazhuara në zbatimin e marrëveshjes, nga SHBA dhe disa vende të BE-së.
