Paratë e xhepit që u jepen azilkërkuesve në Gjermani janë të larta dhe joshin njerëzit të vijnë në këtë vend, edhe kur e dinë se nuk kanë shanse për të qëndruar. Ministri i Brendshëm gjerman,Thomas de Maizière në një intervistë dhënë për ZDF-në nuk lë pa krahasuar këto para me rrogat e marra në Shqipëri apo në Kosovë.
Ai argumentoi se kolegët europianë i kanë thënë se standardet në Gjermani janë shumë të larta e se pagesat për azilkërkuesit mund të jenë të krahasueshme me rrogat që marrin policët, p.sh në Kosovë e Shqipëri për një muaj.
“Na duhet një debat mbi standardet evropiane të dinjitetit njerëzor dhe të pagesave”, thotë de Maizière.
Gjithsesi, ministri pranon se ndihmat financiare që u jepen azilkërkuesve nuk mund të reduktohen në mënyrë arbitrare, por një zgjidhje që ai propozon është zëvendësimi i tyre me ndihma në artikuj ushqimorë dhe sende të tjera të nevojshme.
Paratë që marrin azilkërkuesit si para xhepi janë 140 euro në muaj dhe ato jepen për të përmbushur nevojat bazë të jetës së përditshme.
Fluksi i madh i azilkërkuesve në Gjermani, sidomos vitin e fundit, ka bërë që autoritetet të mendojnë një sërë masash për ta ndalur atë. Mes shumë ideve që qarkullojnë në Gjermani, ku përplasen qëndrimet dashamirëse me ato më pak të tilla, janë edhe masat drastike të dëbimit, grumbullimit në qendra të vecanta të azilkërkuesve nga Ballkani, sikundër edhe paralajmërimet e vazhdueshme në vendet e origjinës për të mos u nisur drejt Gjermanisë. /tesheshi.com/
