Ministri i Transporteve, Edmond Haxhinasto është detyruar që të flasë për ngecjen e punimeve në Rrugën e Arbërit, atë aks që lidh Tiranë me zonën verilindore, për të cilin dibranët më së shumti, këndej dhe andej kufirit, e ëndërrojnë më tepër.
Ishte deputetja me origjinë nga Dibra, Mesila Doda, e cila kërkoi një interpelancë me ministrin Haxhinasto lidhur me fatin e kësaj rruge, që tashmë është një kantier i braktisur.
“Ata njerëz meritojnë që të kenë një mundësi në jetë dhe mundësia e tyre është lidhja me kryeqytetin. Është një zonë nga më të varfërat në vend dhe kjo falë mosseriozitetit të të gjitha qeverive, që shkojnë e vijnë premtojnë Rrugën e Arbrit, dhe ajo rrugë nuk ekziston askund, as virtualisht”, tha zonja Doda.
Por ministri Haxhinasto tha se projekti i gabuar ka çuar në dështimin e deritanishëm të kësaj rruge, për të cilën duhen miliona të tjera që të përfundojë, e që sipas tij qeveria nuk i ka.
“Kjo rrugë është konceptuar keq që në fillim, është planifikuar vetëm 50 për qind e saj me projekt, është investuar në 3 vite 6 miliardë por nevojat janë për shumë më tepër. Vetëm për të përfunduar pjesët e bëra më përpara, jo segmentin aktual, duhen 30 milionë euro, të cilat buxheti i shtetit nuk i ka”, tha ministri Haxhinasto, duke shtuat se për ta përfunduar tërësisht duhen dhe 230 milion euro të tjera.
Haxhinasto bëri me dije se ka pasur disa oferta nga një kompani kineze për ta ndërtuar me formulë Partneritet Publik-Privat, ose me konçension si thuhet ndryshe, por që janë konisderuar të papranueshme nga qeveria. Ai bëri me dije se tashmë është një kompani shqiptare që është vetofruar, e që ndërkohë pritet dhe një ofertë tjetër nga kompania kineze. /tesheshi.com/
