Në një intervistë të dhënë për të përditshmen spanjolle El Mundo, Janis Varufakis, ministri grek i Financave, nuk i ka kursyer fjalët e ashpra për kreditorët europianë, duke i akuzuar ata për “terrorizëm”.
“Çfarë ata po bëjnë me Greqinë ka një emër, “terrorizëm”. Ajo çka duan sot Brukseli dhe trojka është që të fitojë “po”-ja, kështu që të mund t’i poshtërojnë grekët.”
Duke iu referuar Fondit Monetar Ndërkombëtar, Bankës Qendrore Europiane dhe Bashkimit Europian, Varufakis u shpreh, “Pse na shtrënguan t’i mbyllim bankat? Për të shtënë frikë në popull. Dhe përhapja e frikës quhet terrorizëm!”
Ministri në fjalë e bëri të qartë se sido që të jetë rezultati i referendumit të së dielës, bankat kanë për t’u rihapur.
“Europës i duhet një marrëveshje, Greqisë i duhet një marrëveshje, që do të thotë se do të arrijmë një marrëveshje.”
Qeveria greke po bën thirrje për një votë “jo” në referendumin e nesërm, e vetë Varufakis përsëriti betimin se do të japë dorëheqjen nëse do të fitojë “po”-ja.
Ai përmendi më tej Podemos-in, partinë spanjolle, “Mendoj se Europa ka nevojë për parti si Syriza dhe Podemos, që janë kritike të sistemit dhe proeuropiane e demokratike.”
Vota “jo” ditën e nesërme do të thotë se grekët i hedhin poshtë kërkesat e kreditorëve europianë të vendit.
Në anën tjetër, vota “po” tregon se qytetarët grekë i pranojnë kushtet e marrëveshjes së programit të shpëtimit të vëna nga institucionet financiare e politike europiane. /tesheshi.com/
