Pas takimit me ministrin e Punëve të Jashtme të Gjermanisë, Frank- Walter Steinmeier, Kryeministri Rama e ka cilësuar vizitën e ministrit të Jashtëm si të rëndësishme edhe për momentin ku ndodhemi.
“Është një moment historik dhe një reformë historike, siç është reforma në drejtësi, e cila do të çelë rrugë për anëtarësimin në BE. Gjermania dhe ministri i saj i Jashtëm janë investuar seriozisht për të dhënë mesazhin se BE pret krahëhapur Shqipërinë, duke pritur nga Shqipëria që të plotësojë një për një të gjitha kushtet”, – tha Rama.
Ai shtoi se është i lumtur që edhe sot ministri gjerman nënvizoi që opozita duhet të bëjë hapat e veta për të miratuar një draft që është produkt i një bashkëpunimi intensiv me BE dhe SHBA, ku sipas Ramës, Gjermania ka pasur qysh në fillim një vëmendje të veçantë dhe e ka ndjek procesin me kujdes të veçantë.
Nga ana e tij, ministri i jashtëm gjerman deklaroi se Gjermania ndjek me vëmendje të veçantë zhvillimet politike që ndodhin në Shqipëri, ndërsa u shpreh se Shqipëria ndodhet në një fazë mjaf vendimtare të procesit të saj të anëtarësimit në BE.
“Gjermania ka respekt të madh për rrugën e reformave që janë ndërmarrë. Ne ndjekim me interes reformat në sektorin ekonomik, çka do të sjellë më vonë edhe investimet gjermane këtu në Shqipëri. Më tepër interes do të kishim që Shqipëria të ndjekë dhe të gjejë rrugët e veta për një sistem demokratik sa më të qëndrueshëm dhe një pikë kyçe do të ishte lufta kundër korrupsionit dhe reforma në drejtësi”, – ishin fjalët e ministrit Steinmeier.
Ndërsa kujtoi se në vjeshtën e këtij viti Komisioni Eropian do të shqyrtojë pritshmëtitë e veta, nëse ato janë realizuar apo jo, bëri me dije se reforma në drejtësi do të luajë një rol deçiziv.
“Jemi në fazën e një dritareje të hapur të mundësive të dhënë dhe shpresoj që forcat politike të gjejnë rrugën e përbashkët për përmbylljen e reformës në sistemin e drejtësisë”, – tha Steinmeier.
Ai shtoi se “Jemi në një pikë ku Shqipëria nuk kishte qenë kurrë më parë. Jemi përpara një produkti, i cili është në konsulencë me Komisionin e Venecias. Shpresoj që forcat politike të gjejnë kurajën për të marrë vendimet e duhura në këtë kontekst, për të cilën do të nevojitet edhe mbështetja e opozitës”. /tesheshi.com/
