Ministri i Punëve të Brendshme të Gjermanisë, Thomas de Maiziere ka paralajmëruar qytetarët gjermanë, që të mos i trajtojnë të gjithë refugjatët si kërcënim. Kjo deklaratë vie pas një serie sulmesh që kanë ndodhur në Gjermaninë jugore gjatë javës së fundit.
“Ne nuk guxojmë që t’i trajtojmë të gjithë refugjatët si të dyshimtë, pavarësisht rasteve individuale të cilat janë nën hetim”, tha ai në një intervistë për “Funke media grup”, njofton AFP.
Një qytetar sirian, të cilit autoritetet gjermane i kishin refuzuar kërkesën për azil, ka hedhur veten në ajër në një festival muzikor në Bavari, ku vetë ai humbi jetën, kurse 12 persona mbetën të plagosur.
Ky është sulmi i katërt që ka ndodhur në Gjermani brenda një jave, dhe u kry vetëm disa orë pasi një refugjat sirian në Reutlingen, goditi për vdekje një grua me hanxhar, dhe duke lënduar dy persona tjerë. Policia arriti të arrestojë 21-vjeçarin, i cili është person i njohur për policinë.
Para një jave, një azil-kërkues 17-vjeçar sulmoi me sëpatë dhe thikë udhëtarët në një tren në qytetin bavarez Wircburg, ku katër persona u lënduan, ndërsa ai u qëllua për vdekje. /tesheshi.com/
