Sigmar Gabriel, zëvendëskancelari gjerman dhe ministri i Ekonomisë, i ka deklaruar transmetuesit ZDF se bisedimet midis BE-së dhe SHBA-ve për TTIP-in, Partneritetin Transtlantik të Tregtisë dhe Investimeve, kanë dështuar në thelb.
“Sipas meje, negociatat me Shtetet e Bashkuara kanë dështuar de facto, edhe pse askush nuk e pranon këtë.”
Ministri gjerman i Ekonomisë ka vënë në dukje faktin se dy palët nuk kanë qenë në gjendje të gjejnë gjuhën e përbashkët as mbi një kapitull të vetëm të marrëveshjes së diskutuar në 14 raundet e bisedimeve.
“Kanë dështuar,” ka thënë Sigmar Gabriel, sepse ne europianët nuk deshëm t’u nënshtroheshim kërkesave amerikane.”
Pala amerikane kërkon që marrëveshja e tregtisë së lirë të finalizohet e të nënshkruhet para fundit të këtij viti, por nuk ka gjasa të ndodhë kështu.
Kryeministri francez, Manuel Valls, është shprehur se do të jetë e pamundur që dy palët t’u japin fund negociatave para mbarimit të 2016-tës.
Kundërshtarët e marrëveshjes thonë se TTIP-i mund t’i vendosë interesat e korporatave ndërkombëtare mbi ato të vendeve ku ato operojnë, e se do t’i dëmtojë konsumatorët.
Protesta më e fundit ndaj kësaj marrëveshje u zhvillua në Berlin javën e shkuar. /tesheshi.com/
