Ministri i Integrimeve Europiane në qeverinë e Kosovës, Bekim Çollaku, ka bërë një premtim të madh që nuk dihet se sa do të bëhet realitet.
Ai ka thënë se lajme të mira pritet të vijnë nga kryeqyteti i Europës, pasi qeveria ku ai bën pjesë ka përmbushur kërkesat për liberalizimin e vizave për qytetarët e vendit.
“Është krejtësisht e natyrshme të presim lajme të mira kur ne përmbushim detyrat tona për liberalizimin e vizave. Neve na mbet të presim lajmin zyrtar dhe t’i ndjekim procedurat. Ky lajm do të vijë shumë shpejt dhe më shpejt se që është pritur. Këtë çështje do ta lëmë në diskrecion të plotë të BE-së. Ky lajm i shumë pritur do të vijë shumë shumë shpejt. Ky lajm mund të vijë brenda disa ditëve, mund ta konfirmojë këtë”, tha Çollaku, në lidhje direkte nga Brukseli për Info Magazine.
Mosliberalizimi i vizave ka qenë goditja më e madhe për qeverinë e Isa Mustafës, ardhur nga Bruskeli. Ajo ndodhi gjatë kohës pasi ishin hedhur firmat në Bruksel për Asocacionin e Komunave Serbe dhe Demarkacionin me Malin e Zi, për të cilat politika kosovare dhe jeta parlamentare në veçanti, u përfshi nga një krizë e pashembullt, pasojat e së cilës vijojnë ende.
Kur u dha lajmi që Kosovës “nuk do i jepej vizë” për vizat, reagimi qe mjaft i ashpër, sidomos nga Thaçi në pozitën e ministrit të jashtëm, që gati-gati dha shenja se ishte tradhëtuar nga diplomacia europiane për firmat e hedhura së bashku me kryeministrin Mustafa.
Qeveria aktuale e Prishtiës, e pret me padurim “vizën e Brukselit”, pasi do ishte e vetmja arritje e saj që mund t’ja rehabilitonte disi imazhin e rrënuar. /tesheshi.com/
