Atifete Jahjaga, presidentja e Kosovës, është zyrtarja e cila spikat më së tepërmi me gabimet e saj gjatë fjalimeve.
Por duket se e meta e saj ka nisur t’u ngjitet edhe ministrave të qeverisë Mustafa, që edhe pse mundohen fort, ndodh të mos jenë në gjendje të shqiptojnë një fjalë të caktuar.
Ka qenë radha e ministrit të Integrimit Evropian, Bekim Çollakut, të ngatërrohet sot gjatë fjalimit të tij për MSA-në. Ai nuk mundi assesi ta shqiptonte frazën “të përshpejtuar”. Edhe pse u mundua gjatë, nuk ia doli, e me buzë në gaz i ra shkurt, duke e zëvendësuar atë me “të shpejtuar”, sido që me siguri nuk e kishte këtë të fundit në fjalimin e shkruar.
Ndërsa ai fliste, Jahjaga e dëgjonte me kujdes, dhe në një moment mund të thuhet se u “ndje mirë”, pasi kuptoi se nuk ishte veç ajo që gabonte në të folur. /tesheshi.com/
