Ministri për Evropën dhe Punët e Jashtme i Shqipërisë, Gent Cakaj, mori pjesë në aktivitetin e zhvilluar në përkujtim të 70 vjetorit të themelimit të Këshillit të Evropës.
Nëpërmjet një postimi në rrjetin social Facebook ai u shpreh se Shqipëria nuk është vetëm përqafuese e vlerave të Këshillit të Evropës, por edhe një kontribuuese në këto vlera.
“Veçanërisht gjatë kryesisë së OSBE-së 2020, Shqipëria do të punojë ngushtësisht me Këshillin e Evropës në shërbim të mbrojtjes së drejtave të njeriut e promovimit të lirive themelore”, tha Cakaj.
Megjithatë, ministri me prejardhje nga Kosova nuk harroi të përmend rëndësinë e anëtarësimit të Kosovës në këtë organizatë, pasi sipas tij, një gjë e tillë do të ishte vlerë e shtuar për vetë Këshillin e Evropës.
“Nënvizuam fuqishëm faktin se anëtarësimi i Republikës së Kosovës në këtë organizatë nuk është vetëm i rëndësishëm për mbrojtjen e të drejtave të qytetarëve të saj, por edhe një vlerë e shtuar për vetë Këshillin e Evropës”, tha ai. /tesheshi.com/
