Ministri i jashtëm i Shqipërisë Ditmir Bushati ndodhet për një vizitë në Paris, Francë ku u takua me Ministrin e Punëve të Brendshme të Francës, z. Gérard Collomb.
Shqetësimi i qeverisë franceze janë azilantët ekonomikë që vijnë nga Shqipëria dhe për këtë Collomb i ka kërkuar Bushatit që qeveria shqiptare të mos lejojë këtë fenomen.
Për të “mbyllur kufirin” për azilantët qeveria franceze do të ofrojë ndihmë policisë shqiptare.
“Ministrat u ndalën mbi situatën e krijuar nga rritja e kërkesave për azil në Francë, përfshirë nga fëmijë të mitur të pashoqëruar. Me iniciativë të Shqipërisë, palët ranë dakord për të zbatuar një plan veprimi për të forcuar masat për reduktimin e kërkesave për azil nga qytetarë shqiptarë, brenda një kuadri kohor tremujor. Një prej masave është dhe stacionimi në Shqipëri i oficerëve të policisë franceze për të kryer operacione të përbashkëta me policinë tonë kufitare”- njofton MPJ-ja.
“Jemi të ndërgjegjshëm për liritë dhe detyrat që ofron lëvizja e lirë në hapësirën Schengen dhe shume të vendosur për të mos toleruar kërkesat abuzive për azil”, u shpreh Ministri Bushati në përfundim të takimit.
Ministri Collomb theksoi se Franca është e gatshme të ofrojë mbështetjen e saj në këtë drejtim. “Shqipëria është një vend i sigurt, dhe dua të përshëndes planin e veprimit ambicioz si dhe vullnetin e qeverisë shqiptare.” theksoi Collomb. /tesheshi.com/
