Ministri i Jashtëm Ditmir Bushati ka kërkuar ndjesë për gjestin e tij të hedhjes ujë mbi ta. Por, në një sqarim për opinionin nëpërmjet një statusi në FB, Bushati sqaron “psenë” e atij gjesti, ku mes një ndjese është dhe akuza për sjelljet e opozitës.
“Dua të pranoj që në fillim se jam i keqardhur për reagimin tim instinktiv ndaj agresionit të ulët me miell, vezë e të tjera mjete rrethanore, nga grupi i pushtuesve të dhunshëm të foltores së Kuvendit, pa llogaritur lumin e të sharave vulgare!
Kërkoj ndjesë qytetarëve për faktin që nuk arrita të ruaj gjakftohtësinë në ato kushte krejt të papranueshme për çdo mjedis publik, e lere më pastaj për një Kuvend demokratik.
Por reagimi im në atë skenë ku ligësia e verbërisë politike është ulur këmbëkryq duke na turpëruar të gjithëve, edhe njëherë tjetër në sytë e prindërve e të fëmijëve të këtij vendi, as nuk e fshin as nuk e lehtëson barrën e rëndë të përgjegjësisë së dhunuesve recidivë të bashkëjetesës parlamentare. Të cilët ushqejnë publikun me farmakun e gjuhës vulgare duke u bere shembulli udhëheqës për çdo rrëmujaxhi e shkatërrues potencial të aspiratave të qytetareve të zakonshëm të këtij vendi”, shkruan Bushati.
Më tej ai ndalet tek dy figurat kryesore të opozitës, ku sipas tij po veprojnë të koordinuar për ta frenuar me patjetër marrjen e statusit.
“Salla e Kuvendit, nga një hapësirë ku, si në çdo vend të botës demokratike, duhet të triumfojë debati i civilizuar, është kthyer nga Lulzim Basha dhe Monika Kryemadhi në një skenë turpëruese, ku opozita me çdo kusht kërkon të vrasë fjalën argumentin dhe vetë ligjësitë e bashkëjetesës demokratike.”
“Njësoj siç tentuan të bllokojnë reformën në drejtësi me çdo mjet dhe siç tentuan të shkatërrojnë zgjedhjen për të bllokuar Vetingun, ata sot po tentojnë të bllokojnë të ardhmen e Shqipërisë Evropianë. Nuk ia dolën atëherë, nuk do t’ia dalin dot as tani”, thekson Bushati. /tesheshi.com/
