Bernard Cazeneuve, ministri i Brendshëm në qeverinë franceze, ka thirrur disa prej udhëheqësve muslimanë në vend, si dhe politikanë, për të diskutuar mbi të ardhmen e Islamit në Francë.
Takimi i djeshëm është organizuar pas tensioneve të ditëve të fundit mbi çështjen e burkinit, shoqëruar dhe me incidente të tjera, siç qe ai i një restoranti që nuk pranonte t’u shërbente muslimanëve.
Cazeneuve e ka bërë të qartë se kërkon ngritjen e një fondacioni të ri për muslimanët e rreshtuar më tepër në krah të interpretimit francez të shekullarizmit.
“Lufta kundër Islamit radikal,” raporton Al Jazeera të ketë thënë ai, “nuk duhet të kryhet kurrsesi kundër muslimanëve në Francë, shumica dërrmuese e të cilëve janë republikanë që thjesht duan ta jetojnë fenë e tyre në një mënyrë paqësore dhe me dinjitet.”
Takimi i organizuar nga ministri i Brendshëm francez ka patur si përfundim planet për të krijuar tre organizata për “mbylljen e hendekut të gjerë kulturor dhe fetar në shoqërinë franceze”.
Njëra nga organizatat do të ndjekë procesin e integrimit të besimit musliman, tjetra atë të ndërtimit të xhamive, dhe e treta do të merret me imamët.
Raportuesja e Al Jazeera-s nga Parisi, Sue Turton, deklaron se shteti francez kërkon të ketë një lloj kontrolli mbi mënyrën se si u predikohet muslimanëve në Francë. Ajo vë në pah komentet e ministrit të Brendshëm se imamët duhet t’i mbajnë predikimet në frëngjisht, e jo në arabisht, dhe t’i “kuptojnë vlerat franceze”.
Po dje, ish-presidenti Nicolas Sarkozy, i cili e ka shfaqur hapur dëshirën për t’u rikthyer edhe një herë në të njëjtën detyrë, ka deklaruar se, nëse do t’i fitojë zgjedhjet presidenciale, do ta ndryshojë kushtetutën për ta ndaluar burkinin.
Sarkozy tha se do të propozonte një ligj që i vinte në shenjë specifikisht femrat që vishnin burkini në plazh apo në pishina. Kur atij iu kujtua se kjo do të ishte jokushtetuese, Sarkozy u shpreh se do të ndryshonte kushtetutën. /tesheshi.com/
