Incidenti tragjik, i ndodhur ditë më parë pranë Medelinit në Kolumbi, kur një avion u rrëzua dhe u mori jetën 71 personave, mes të cilëve dhe një ekip futbolli brazilian, është cilësuar si “vrasje” nga ministri bolivian i Mbrojtjes.
Reymi Ferreira ka bërë me faj pilotin e avionit, që me vetëdije ka fluturuar pa sasinë e duhur të lëndës djegëse.
“Përfundimisht, ky nuk ishte aksident. Ishte një vrasje. Çfarë ngjau në Medelin ishte një vrasje,” u ka thënë gazetarëve ministri bolivian.
“Qartazi, nëse piloti do t’u ishte përmbajtur rregullave, për t’u ulur në Kobija apo në Bogota, apo më së paku nëse do të kishte deklaruar një gjendje emergjente që nga fillimi, përpara se të ishte gati për të patur një aksident, ka të ngjarë që kjo tragjedi nuk do të kishte ndodhur.”
Në Bolivi, Brazil e Kolumbi vijojnë hetimet mbi ngjarjen. Bolivia ka pezulluar lejen për kompaninë ajrore LaMia, si dhe ka bërë një sërë arrestimesh. /tesheshi.com/
